Во пресрет на новогодишните празници, децата од Државното училиште за рехабилитација на деца и младинци со оштетен вид „Димитар Влахов“ денеска добија новогодишни пакетчиња и две цедиња со радио драмите „Легенда за Лапонија“ (новогодишна бајка) и „Вејка на ветрот“. Радиодрамите „Легенда за Лапонија“ и „Вејка на ветрот“ се подарок од Македонски Телеком, додека пакетчињата се од Фондацијата T-Mobile за Македонија.

Цедињата со радиодрамите кои ги добија децата од „Димитар Влахов“ се проект на „Еј продукција“ за снимање на 5 радиодрами и една новогодишна бајка за деца, кој е несебично поддржан од Македонски Телеком. Со овој проект, на сите лица со оштетен вид ќе им биде овозможен полесен пристап до драмската уметност. До крајот на февруари се очекува да бидат снимени уште четири аудиозаписи за познатите литературни дела: „Злосторство и казна“, „Разговори во лимбот“, „Домар“ и „Буре барут“, во кои ќе можат да уживаат не само децата од Државното училиште за рехабилитација на деца и младинци со оштетен вид „Димитар Влахов“, туку и членовите на Сојузот на слепи лица.

„Со поддршка на проектот за снимање на новогодишната бајка и на пет радиодрами, Македонски Телеком покажува особена грижа кога станува збор за збогатување на секојдневието на лицата со посебни потреби и им го олеснува процесот на учење и совладување на материјата предвидена со образовните програми. Компанијата, на овој проект гледа како придонес во воспоставувањето на цврста основа за културна и општествена интеграција на сите членови во заедницата“, изјави г-дин Димитар Ковачевски, извршен директор на Област за комуникација во Македонски Телеком.

" Реализацијата на проектот пет радиодрами и една новогодишна бајка е доказ дека и нашата земја ги следи препораките од светските дефектолози за подобрување на квалитетот на културното живеење на хендикепираните лица. Затоа, би сакал да упатам голема благодарност до Македонскиот Телеком и до членовите на Лајонс Клубот „Св. Пантелејмон“ од Скопје за хуманоста која што ја покажаа безброј пати досега и за извонредниот слух кој што секогаш го имаат кога се во прашање потребите на лицата со оштетен вид", изјави г-дин Жарко Селковски, претседател на Сојузот на слепите на Република Македонија.

Од друга страна, Фондацијата T-Mobile за Македонија, која на овие деца им подели новогодишно пакетче, во рамките на својот традиционален новогодишен караван посети над 900 дечиња згрижени во неколку специјални домови, институции и болници низ Македонија.

Информации

{{Title}}