UNICEFI dhe Fondacioni Telekomi për Maqedoninë u bëjnë thirrje fëmijëve dhe të rinjve t’i bashkohen fushatës për luftë kundër dhunës onlajn dhe gjuhës së urrejtjes

Shkup, 19 prill 2023: UNICEF-i dhe Fondacioni Telekomi për Maqedoninë shpallin një thirrje të re të hapur për fëmijët dhe të rinjtë që t’u bashkohen iniciativave të komunikimit për t'u përballur me dhunën onlajn dhe gjuhën e urrejtjes në internet. Thirrja me titull: "Së bashku për internet pa urrejtje" është pjesë e një partneriteti afatgjatë midis UNICEF-it dhe Fondacionit Telekomi për Maqedoninë, që synon t’i përfshijë fëmijët dhe të rinjtë në përballjen me disa prej sfidave më të mëdha me të cilat ballafaqohet gjenerata e tyre.

“Rritja në epokën e internetit ofron mundësi të pakufizuara. Kur përdoret në mënyrën e duhur, interneti ka potencialin për të zgjeruar horizontet, duke hapur mundësi për të mësuar, qasje në informacione, për të luajtur dhe për të shprehur veten. Por, me këto mundësi vijnë edhe rreziqe serioze”, tha Patricia DiXhovani, përfaqësuese e UNICEF-it. “Tani më shumë se kurrë, fëmijët dhe të rinjtë kanë nevojë për aftësi për të treguar respekt dhe për të qenë të sjellshëm me të tjerët onlajn, por edhe për të folur lirshëm kundër dhunës onlajn“.

“Ne e ndërtojmë të ardhmen digjitale, por shkojmë një hap më tej, po i vendosim vetes një detyrë ambicioze për të punuar mbi etikën e asaj të ardhmeje digjitale. Gjuha e urrejtjes në internet e meriton vëmendjen tonë dhe ne e kemi për obligim të bëjmë diferencën. Edhe pse kjo është një sfidë e të gjitha gjeneratave, ajo e prek më së shumti rininë. Kjo është arsyeja pse ne u japim atyre zë, njohuri, mjete për të luftuar për një internet pa urrejtje dhe pikërisht ata të jenë bartës të ndryshimit” – tha Nikolla Lushev, kryetar i Fondacionit Telekomi për Maqedoninë.

Fëmijët dhe të rinjtë kalojnë më shumë kohë se kurrë më parë onlajn – 88.3% e të rinjve në rrjetet sociale, ndërsa aty më së shumti ndodh dhuna onlajn dhe gjuha e urrejtjes. Sipas një sondazhi të fundit të UReport madje 24% e të rinjve të paktën njëherë janë ndjerë të pasigurt në internet vitin e fundit. Këto të dhëna tregojnë se sa e rëndësishme është të flasim hapur dhe vazhdimisht për këtë temë dhe të përpiqemi t’i mbrojmë të rinjtë, por edhe t'u tregojmë se si ta luftojnë kërcënimin.

Qëllimi kryesor i nismës është t’i përfshijë të rinjtë dhe t’ua bëjë me dije si të fillojnë me ndryshimin.

Nëpërmjet punëtorive për krijimin e përbashkët me mbështetjen e profesionistëve në fushën e komunikimit, edukimit mediatik, mbrojtjen e fëmijëve, si dhe ekspertëve të teknologjive të reja dhe krijuesve të përmbajtjeve multimediale, fëmijët dhe të rinjtë që do të përzgjidhen përmes kësaj thirrjeje të hapur do të përqendrohen në problemet, do të mësojnë se si t'i trajtojnë ato dhe do të krijojnë një fushatë ndërgjegjësimi për bashkëmoshatarët e tyre dhe publikun e gjerë.

Punëtoritë do të organizohen në maj dhe në to mund të paraqiten të rinjtë e moshës prej 14 deri në 19 vjeç, me plotësimin e formularit vijues: https://t.ly/p08z

Pres Qendra

{{Title}}