На средбата со новинарите Ирена Мишева, Виш менаџер за спонзорства, претставникот на Македонски Телеком, кој е генерален спонзор на манифестацијата, изјави:

Како компанија која секогаш се стреми да ги препознае вистинските вредности, Македонски Телеком секогаш е безрезервен поддржувач на културните случувања во земјата. Оттаму и причината веќе неколку години да бидеме пријател на Вевчанскиот карневал во улога на генерален спонзор. Вевчани во деновите за Василица со своите уникатни маски претставува отворен театар за сите свои гости и навистина е задоволство да се биде дел од едно вакво неверојатно доживување.

Карневалот во чест на Свети Василиј Велики - заштитник на вевчанските василичари, на Вевчани и на вевчанци, се разликува од останатите во светот поради неговата архаичност и уникатни маски и е спој меѓу паганскиот и современиот начин на прослава.

За време на неговото одржување Вевчани се претвора во своевиден театар без граници со помали или поголеми маскирани карневалски групи. За времетраењето на карневалот, вевчанци од целиот свет се прибираат дома за да учествуваат во единствената „претстава“ со која се исмеваат и жигосуваат појавите и личностите од општествениот живот.

Годинава карневалот неофицијално ќе започне на 12 јануари попладнето со изложба на фотографии од Атанас Ќушкоски на тема женски маски, а ќе продолжи вечерта со голем рок хепенинг на кој меѓу другите ќе настапат „Ареа„, „Црвена јабука“ и „Скандал состав“.

Главниот карневалски ден е 13 јануари со традиционалното дефиле на маски, годинава зачинето со пречек на Старата нова година на отворено на плоштадот во Вевчани со концерт на естрадни уметници од земјава и соседството.

Манифестацијата завршува на 14 јануари со традиционалното Вевчанско василичарско оро и ритуалното палење на маските.

- Вевчанскиот карневал опстојува колку што е старо и Вевчани. Можеби има корени уште од времето на римскиот император Октавијан Август поради што една од главните маски на карневалот е Глупи Август... Вевчанскиот човек како дел од македонскиот народ се грижи за карневалската традиција. Се додека се слушаат тапаните на Василица традицијата ќе продолжи и ќе трае, рече Перо Илиески, градоначалник на општина Вевчани на прес-конференцијата.

Вевчани сè повеќе наликува на туристичко место наместо на печалбарско, познато по своите неимари - најдобрите фасадери во земјава и пошироко, а на ланскиот карневал имало гости и од Велика Британија, Австралија и Нов Зеланд.

Во 1993 година Вевчанскиот карневал, односно Вевчани стана член на ФЕЦЦ - Асоцијација на светските карневалски градови.

Информации

{{Title}}