Модерното живеење донесе промени во начинот на функционирање во урбаните средини, поради кои самите градови мораат да поминат низ своевидна трансформација за да одговорат на сите потреби на граѓаните. Подобрувањето на градската инфраструктура и поефикасното користење на ресурсите се клучни темели за воспоставувањето на еден Паметен град, а како најголемата урбана средина во земјата, Скопје веќе ја започна својата трансформација.

Првите чекори кон Скопје Паметен град се поставување паметни ЛЕД светилки коишто ќе го регулираат уличното осветлување и ќе го направат градот побезбедно место за живеење. Првите светилки од ваков тип се поставени на булеварот „Никола Карев“ и долж улицата „Франклин Рузвелт“, па сè до Зоолошката градина, а инсталацијата на нови светилки ќе продолжи на булеварот „Илинден“, на потегот од Зоолошката градина до мостот „Гоце Делчев“, како и на булеварите „Партизански Одреди“ и „Александар Македонски“, по целата нивна должина.

Со поставувањето на овие светилки, Град Скопје добива современо, енергетски ефикасно решение за справување со потешкотиите коишто произлегуваат од неадекватното и застарено улично осветлување. Преку Паметното осветлување, Градот ќе им овозможи на граѓаните побезбедно движење, а истовремено поради иновативната технологија којашто ќе го регулира осветлувањето, драстично ќе ги намали годишните оперативни трошоци дури и до 60-70%.

Проектот Скопје Паметен град го реализира Македонски Телеком, со користење на најсовремена технологија којашто е единствена не само во нашата земја, туку и во регионот. Со проектот е предвидено да се постават околу 10.000 ЛЕД светилки и да се дигитализира системот за осветлување во зависност од движењето на луѓето и затемнетоста на околината. Освен паметното осветлување, овој проект опфаќа и други модули коишто се во тек на имплементација, како паметно трошење вода, паметен паркинг, поддршка на корисници, контакт центар и квалитет на воздух.

Скопје е уште еден од низата градови во земјата каде што Паметното осветлување е имплементирано како дел од револуцијата на урбаното живеење. Претходно, општините Македонска Каменица и Чешиново-Облешево станаа првите коишто го имплементираа ова решение, а од неодамна и Општина Крива Паланка.

Статија

{{Title}}