T-Home и T-Mobile, како компании кои ги препознаваат и поддржуваат вистинските културни вредности, и годинава се традиционални партнери и пријатели на „Охридско лето“, фестивал кој стана препознатлив белег на Македонија и настан кој создава моменти вредни за паметење и споделување.

На 12 јули 2011 година, со музичко-сценскиот спектакл „Трилогија Романа“ во продукција на познатата шпанска компанија „Ла Фура делс Баус” и во изведба на Македонската филхармонија, во Античкиот театар свечено ќе биде отворено 51-то издание на фестивалот „Охридско лето“. Со изведбата на ова грандиозно дело, Охрид има чест да стане дел од листата на градови во кои се одржува светската премиера на „Трилогија Романа“, по изведбата во Рим и Валенсија. На овој начин, фестивалот уште еднаш потврдува дека не само што ги следи современите текови во уметноста, туку и го издигнува културниот живот во Македонија со уметници од светски размери.

Белег на годинешното издание ќе остават млади, но етаблирани светски музички имиња, од кои повеќето никогаш претходно не настапувале на најпознатата музичко-сценска манифестација во Македонија. На фестивалот ќе настапат познати уметници, како Најџел Кенеди, еден од најпродаваните виолинисти во светот, руската пијанистичка елита Алексеј Володин, Александар Гидин и Борис Березовски, потоа атрактивните „Осум тенори“ од Русија, концертот на Дуке Бојаџиев и заедничкиот настап на Влатко Стефановски и Стефан Миленковиќ.

Годинешното издание на Охридско лето ќе изобилува и со богата драмска понуда. На програмата на фестивалот се дела на реномирани автори кои во историјата на драматургијата оставиле силен печат, како Шекспир, Бомарше, Хајнер Милер, Еврипид и др. Предвидени се три премиери на домашни театри и тоа - „Свадбата на Фигаро“ на МНТ, „Кабаре мистериозо“ на новоформираниот Охридски театар и „Медеја“ на Битолскиот театар. За љубителите на ликовната уметност, фестивалот ќе понуди и голем број изложби.

Информации

{{Title}}