Дојче Телеком ќе добие 39 милијарди долари, од кои 25 милијарди во готово и 8% акции во АТ&Т во вредност од 14 милијарди долари.

Дојче Телеком ќе добие 8% од акциите на американскиот AT&T, додека AT&T станува комплетен, 100% сопственик на Т-Mobile Америка. За тоа германскиот телекомуникациски гигант ќе добие 39 милијарди долари, од кои 25 милијарди во готово и 14 милијарди долари во акции на AT&T. Склучувањето на договорот се очекува да биде завршено во првата половина од 2012 година, откако претходно треба да го одобри регулаторното тело на САД. Дојче Телеком, по склучувањето на договорот, треба да добие и еден претставник во Одборот на директори на AT&T.

Главниот извршен директор на Дојче телеком, Рене Оберман изјави дека е постигнато најдоброторешение за компанијата, корисниците и акционерите. „Со ова ќе ја зајакнеме нашата позиција во Европа, а истовремено ќе продолжиме да учествуваме во бизнисот на мобилни податочни услуги во САД, којшто брзо се развива. Ќе можеме повеќе да се фокусираме на можностите на модерната инфраструктура во Германија и Европа, како и на интернет производите кои се составен дел на нашата севкупна стратегија „фиксирај, трансформирај, иновирај“. По нашите иницијативи за изнаоѓање на решение за нашите активности и во Обединетото Кралство и во Полска, со оваа зделка речиси успеавме да го оствариме „фиксирај“ делот од нашата стратегија. Сега ќе ги фокусираме нашите ресурси повеќе на „трансформирај“ и „иновирај“ деловите од нашата стратегија за да ја забрзаме трансформацијата на Дојче Телеком“, изјави Оберман.

Според главниот директор за финансии Тимотеус Хоџис, Дојче Телеком како најголем поединечен акционер на AT&T, ќе има значителни придобивки од нивната силна дивиденда. „Со одличните резултати од оваа зделка ќе можеме да продолжиме да ја развиваме нашата компанија. Во исто време ќе можеме да ги намалиме нашите долгови и да иницираме една од најголемите програми за откуп на сопствени акции во Германија и во европската телекомуникациска индустрија“, истакна Хоџис.

Рендал Стивенсон, главниот извршен директор на AT&T изјави дека ваквата трансакција ќе обезбеди придобивки за корисниците, акционерите и јавноста, а кои на ова ниво се можни само со комбинација на комплементарните мрежни технологии, широките портфолиа и активности на двете компании. „Ние сме сигурни во нашите способности да спроведеме беспрекорна интеграција, а со проширувањето на портфолиото и мрежата можеме подобро да ги исполниме барањата на нашите корисници, да градиме за иднината и да помогнеме во остварувањето на целите на Претседателот за целосно поврзана Америка со безжичен интернет со големи брзини“, изјави Стивенсон.

Информации

{{Title}}