МЛАДИТЕ ЛУЃЕ ГО МЕНУВААТ СВЕТОТ, А НИЕ СМЕ ТУКА ДА ИМ ГО ПОКАЖЕМЕ ПАТОТ

Smart Start е програма за студентски развој којашто нуди одлична можност за студентите коишто се нетрпеливи да се зафатат со дигиталната трансформација, во партнерство со една од најиновативните компании на пазарот – Македонски Телеком. „Со оваа атрактивна програма за кариерен развој на млади и амбициозни луѓе коишто студираат технологија, маркетинг, дигитални науки и сонуваат да се соочат со предизвиците произлезени од овие теми, Телеком прави позитивни промени во повеќе сегменти од општеството, но особено на полето на пазарот на труд, каде побарувачката од овој тип специфични вештини е голема, а понудата мала или воопшто ја нема“, вели Директорот за човечки ресурси на Македонски Телеком, Ставрос Георгакопулос, во ова интервју.

1. Кои се клучните поенти? Која е приказната позади Smart Start?
Живееме во свет којшто многу брзо се менува, речиси секојдневно, во скоро сите области. Свет во кој знаењата молскавично застаруваат и се соочуваме со големи предизвици што бараат нови решенија, коишто некогаш излегуваат од рамките на шаблоните што досега ги знаеме и практикуваме. Сметам дека такви решенија најдобро можат да дадат луѓе коишто не се оптоварени со минатото, коишто живеат во сегашноста, но мечтаат за иднината. Тоа се младите луѓе, студентите. Од друга страна, Македонски Телеком е компанија што води исклучителна грижа за иднината, целосно е посветена на своите вработени, а нејзина стратешка определба е постојано креирање иницијативи за развој на вработените, а со тоа и на целата организација.
Една таква иницијатива е и Smart Start програмата со која сакаме да привлечеме нови, млади таленти да ни се приклучат и да бидат значаен дел од она на кое компанијата е целосно фокусирана, а тоа е дигиталната трансформација. Програмата е наменета за студенти од 7 различни факултети во земјава коишто се љубопитни да нурнат подлабоко во сферата што ја изучуваат и низ која ќе можат да учат од најдобрите експерти во областите како: технологии, мрежа, маркетинг... И, секако, да бидат дел од тимот којшто ја создава дигиталната иднина во земјава. Со Smart Start обезбедуваме можност студентите да работат на 11 уникатни проекти и да стекнат практично искуство коешто на пазарот на труд е навистина барано и е повеќе од потребно. Верувам дека студентите коишто ќе ни се приклучат преку програмата Smart Start ќе донесат нова енергија, ентузијазам и автентичност, карактеристики коишто се дел од основните принципи на секоја успешна и иновативна компанија.

2. Што е она што ја прави оваа програма интересна и атрактивна за студентите?
Нудиме уникатна и сосем различна можност. Креиравме концепт во кој ги земавме предвид потребите како на студентите, така и на бизнисот. Се навратиме во времето кога бевме студенти, направивме истражување на пазарот коешто ни покажа што е она што им е потребно на студентите и создадовме проект којшто веруваме дека е атрактивен од неколку аспекти. Пред сѐ, креиравме и понудивме постоечки проекти со конкретни активности на кои студентите ќе можат да работат и да учат. Ова не подразбира само вршење пракса со стекнување генерално познавање на нештата, тука станува збор за стручно оспособување во конкретна област преку практична работа на специфичен проект. Од првиот ден, студентите ќе се запознаат со својот тим, со менторот којшто ќе ги поддржува и подучува низ работата, како и со деталите од проектот на кој ќе почнат да работат. Се разбира, студентите ќе поминат и низ обука за да можат полесно да се вклопат во начинот на работа во една голема корпорација како што е нашата и, при тоа, како дел од оваа програма, тие ќе ги уживаат сите придобивки коишто ги имаат и вработените во Македонски Телеком. Тоа значи дека ќе имаат пристап до нашите платформи за учење Percipio и Cursera, коишто нудат над 200 предавања од врвни универзитети. Студентите ќе работат во интернационална средина и ќе стекнат контакти коишто ќе им помогнат во иднина. Ќе ги имаат на располагање нашите врвни експерти, од кои ќе научат многу повеќе од она што може да се научи од која било книга. Искуството што ќе го стекнат тука, кај нас во Македонски Телеком, ќе биде од непроценливо значење за нивната иднина и фантастичен старт за професионална кариера.

3. Проектите во оваа програма опфаќаат области од бизнис до технологија. Зошто токму овие специфични области?
Да, токму тоа се областите коишто нѐ водат напред, коишто се во чекор со најновите трендови и коишто ја креираат дигиталната иднина. Ние мораме да размислуваме за она што ќе се случува утре, за идните потреби на нашите корисници, како и за потребните вештини што треба да ги поседуваат нашите вработени во иднина. Светот во кој живееме секојдневно се менува со огромна брзина, а проектите во овие области нѐ носат чекор напред кон овие промени. Нашата водечка позиција на пазарот ни овозможува да направиме промена во општеството на патот кон дигитализацијата и едукацијата на младите. Намерата на оваа програма е на едно место да се собере креативниот потенцијал на студентите од нашата држава од посочените области, интереси и полиња на дејствување и да им се даде шанса и простор за нивно реализирање.

4. Како би изгледал еден ден на студентите во Телеком?
Ден полн со изненадувања, секако пријатни и посакувани, ден кој завршува со насмевки. Верувам дека сосем поинаку ќе можев да ви раскажам за еден нивен ден да не се наоѓавме во оваа ситуација со пандемијата. Ова го кажувам од причина што искуството од работа во една креативна средина, исполнета со колеги од различни области, е сосема различно од работата од дома. Во оваа ситуација, здравјето на нашите вработени ни е најважно и затоа сите работиме од дома, онаму каде тоа е применливо. Работата се одвива беспрекорно, што е секако очекувано имајќи предвид дека технологијата, како наша силна страна, овозможува сѐ да функционира и од дома. За да ви одговорам на прашањето ќе кажам дека во еден ден секој од овие студенти ќе научи многу практични работи и ќе извршува задачи како и секој наш вработен. Во зависност од проектот на кој работи, ќе има виртуелни состаноци, ќе добива задачи и ќе биде во постојана комуникација со својот ментор, којшто ќе го води низ процесот.

5. Smart Start е насочена и кон една повисока цел. Какво влијание ќе направи оваа програма врз општеството?
Пазарот на труд во нашата држава низ годините многу се измени и продолжува да се менува, согласно барањата на компаниите и развојот на технологиите. Ние, како двигатели во дигитализацијата и воедно како технолошки лидер во регионот, имаме обврска нашите познавања и искуства да ги пренесеме на оние коишто сѐ уште студираат и теоретски се надградуваат. Одговорно тврдам дека преку искуството што овие студенти ќе го добијат во Македонски Телеком со програмата Smart Start, ќе направиме големa промена на пазарот на труд, каде побарувачката од овој тип вештини е голема, а понудата мала или воопшто ја нема. Телеком, како општествено одговорна компанија, преку Smart Start директно влијае уште во процесот на образование на студентите и истиот го збогатува со врвно искуство. Примерите од овој тип создаваат професионалци, а ние како компанија секогаш ги отвораме своите врати и обезбедуваме поддршка за успешни професионални приказни. Со овој проект се надевам дека ќе отвориме една поинаква перспектива, нов простор за надградба, усовршување и тимска работа на младите луѓе со цел поинаку да се гледа на креирањето иднина за македонското општество. Да ги насочиме да нудат решенија и свои визии во овој забрзан свет, што ќе бидат од полза не само за државата, туку и за регионот и пошироко, бидејќи живееме во свет во кој глобалното стана локално. Младите луѓе – студентите го менуваат светот, а Македонски Телеком е тука да им го покаже патот.

Интервју

{{Title}}