Детскиот фонд на Обединетите нации (УНИЦЕФ) и Фондацијата Т-Mobile за Македонија денес ја претставија кампањата „Првите 5 се најважни на свет“. Целта на кампањата е да ја промовира важноста на развојот во раното детство и да мобилизира поддршка за отворање нови центри за ран детски развој.

Кампањата е одговор на потребата од поддршка за родителите и старателите за подобро да ги разберат развојните потреби на децата во најважните години од животот - првите пет. „ Преку кампањата сакаме да им помогнеме на родителите да научат како подобро да се грижат за децата во првите пет години од животот, како и - што е исто толку важно - да бараат подеднакво квалитетна грижа од другите возрасни што се грижат за нив – без оглед дали тоа се наставници, воспитувачи, негувателки или членови на семејството, “ изјави претставникот на УНИЦЕФ др. Бертран Демулен.

Кампањата исто така е одговор на потребата од зголемен пристап до услуги за ран детски развој. Во моментот вакви услуги пружаат единствено градинките кои се финансирани од државата и мал број центри за ран детски развој кои беа отворени со помош на УНИЦЕФ. Иако пристапот до овие услуги е двојно зголемен од 2005 година до сега, во моментот само 1 од 5 деца (22%) на возраст од 3 до 5 години посетува градинка или центар за ран детски развој.

Кампањата има за цел и да мобилизира поддршка од повеќе чинители - општини, приватни компании и поединци - за да се обезбеди пристап до квалитетни програми за ран детски развој за што повеќе деца. На почетокот од годината, во рамките на партнерството со УНИЦЕФ, Фондацијата Т-Mobile за Македонија се заложи да донира 50,000 УСД за отворање дополнителни центри за ран детски развој. Кампањата ги повикува општините да влезат во партнерство со УНИЦЕФ и приватните претпријатија и поединци да донираат за да може да се прошири мрежата на програми за ран детски развој во оние заедници кои имаат најголема потреба од нив.

“Знаејќи ја важноста и потребата од раниот детски развој, имаме за цел да ги поттикнеме родителите и згрижувачите да дознаат што повеќе, но и да ги ангажираме сите општествени чинители да отвориме што е можно повеќе центри за Ран детски развој, како алтернатива на градинките, особено во средини каде не е исплатливо да се градат градинки – а тоа се руралните и маргинализираните средини. Со тоа им пружаме на децата од ранливи средини еднаква можност за рана едукација, која ќе им помогне да бидат подобри во училиште, и воопшто понатаму во животот. Затоа од денес почнуваме со кампања, која освен што ја потенцира важноста на раниот детски развој, има за цел да поттикне генерирање на средства, за отворање на нови центри за ран детски развој. Со оваа кампања, најпрво ги поттикнуваме општините да направат партнерство со УНИЦЕФ, бизнис заедницата да посвои центри и сите граѓани на Република Македонија, да донираат на донаторниот број 143 555 од сите оператори,”изјави г-а Леа Липша, директор на Фондацијата Т-Mobile за Македонија.

Во моментот функционираат 20 Центри за ран детски развој кои беа отворени преку програмите на УНИЦЕФ за поддршка на локалната самоуправа. Со помош на средствата донирани од Фондацијата T-Mobile за Македонија ќе се отворат пет центри за ран детски развој во Јаргулица (Радовиш), Селце (Тетово), Десово (Долнени), Злеово (Радовиш) и Долно Лисиче (Аеродром).

Кампањата беше изработена со поддршка од следните поединци и компании кои го донираа своето време и услуги: Алфа ТВ, Алсат ТВ, crnobelo.mk; danu.biz; Httpool; kajgana.mk; Коха; Кристијан Ристевски; Media Print Macedonia; femina.mk; МРТВ; Небојша Гелевски; Nextsense, Publicis; Сител ТВ; Телма ТВ и time.mk.
Кампањата ја поддржуваат сите три мобилни оператори во земјата Т-Mobile, ONE и VIP преку број за донации 070/075/077 143 555.

За да дознаете повеќе за кампањата „Првите 5 се најважни на свет“ посетете ја веб страната www.prvite5.mk. Исто така следете ја кампањата на www.facebook.com/pvite5 и https://twitter.com/prvite5 за да бидете во тек со резултатите од активностите.

За подетални информации, обратете се на:
Леа Липша, директор на Фондацијата Т-Mobile за Македонија, E-Mail: FoundationT-MobileforMacedonia@telekom.mk,
Сузи Папас Чаповска, службеник за комуникација, УНИЦЕФ Скопје, E-mail: spappas@unicef.org

Дополнителни информации:
Центрите за ран детски развој кои ќе бидат отворени во рамките на иницијативата ќе работат според претходно тестиран модел на УНИЦЕФ. Центрите за ран детски развој кои и формално се регулирани во Законот за детска заштита претставуваат најисплатива алтернатива на градинките. Најдобро одговараат на потребите на заедниците кои немаат градинки како што се селските и маргинализираните средини. Децата посетуваат организирани програми за учење неколку часа во денот, а родителите учествуваат во едукативни програми за подобро работење со децата дома. Програмата според која работат центрите се заснова на Стандардите за рано учење и развој кои беа изготвени со поддршка од УНИЦЕФ.

Сите центри ќе се отворат во партнерство со општините кои обезбедуваат физички простор (зграда) за центарот. Со сите пари што ќе се соберат преку оваа иницијатива ќе раководи УНИЦЕФ за да ги покрие трошоците за мали поправки и адаптација на просторот , за снабдување на центарот со мебел, играчки, едукативен материјал и дидактички материјал, како и за изготвување материјал за родителите и обука на едукаторите во спроведувањето на најсовремените методи од областа на раниот детски развој.

Информации

{{Title}}