Annual report 2024

Raport
vjetor 2024

Adresimi i menaxhimitPërmirësimi i rrjetit, inovacioni dhe optimizmi dixhital

Të dashur klientë, partnerë dhe miq, Me krenari ju prezantojmë raportin mbi rezultatet e jashtëzakonshme, inovacionet dhe aktivitetet shoqërore të Makedonski Telekom në vitin 2024. Këtë vit, ne konfirmuam rolin tonë si lider në sektorin e telekomunikimeve, inovator në teknologji dhe një urë drejt së ardhmes dixhitale, mbase çdo hap i yni ishte drejtuar kah ofrimi i përvojës më të mirë për përdoruesit, si dhe kujdesi për shoqërinë dhe mjedisin. Në vitin 2024, arritëm rritje të qëndrueshme në të gjithë treguesit kryesorë, kurse investimet kapitale (CAPEX) në fund të vitit arritën në 2,286 milionë denarë, duke konfirmuar përkushtimin tonë për modernizim dhe zhvillim të vazhdueshëm.

Ne vazhduam me investime masive për modernizimin dhe zgjerimin e rrjetit. Infrastruktura jonë është më e mira në vend, gjë që u konfirmua me fitimin e çmimit prestigjioz Ookla® për rrjetin më të shpejtë celular dhe fiks, si dhe cilësinë më të mirë të rrjetit celular. Përveç zhvillimit të rrjetit tonë 5G dhe rrjetit optik (fibra), ne kemi ndërmarrë gjithashtu një hap pionier në zhvillimin e infrastrukturës së telekomunikacionit në vend duke vendosur kabllon e parë nënujore me fibra optike në Maqedoni. Strategjia jonë synon të nxisë teknologjitë e reja për të ofruar përvojën më të mirë të përdoruesit. Prandaj, pozicioni numër një në treg u konfirmua nga indeksi i kënaqësisë së klientit TRI*M si dhe nga indeksi Love Brand.

Ne mbetemi një lider në transformimin dixhital të shoqërisë. Qendra jonë e zhvillimit të zgjidhjeve të avancuara ka përmirësuar të gjitha zgjidhjet inteligjente, duke përfshirë ato për një sistem inovativ telemjekësie, ndriçim inteligjent, matës inteligjentë, kontroll IoT për energjinë elektrike dhe ujin, si dhe shërbime të sigurisë kibernetike. Në vitin 2024, morëm certifikatën prestigjioze rajonale Employer Partner nga SELECTIO Group, si dhe çmimin për punëdhënësin më të parapalqyer në sektorin e telekomunikimeve sipas "Vrabotuvanje.com". Në vitin 2024, ne vazhduam të mbështesim sportin, kulturën dhe filantropinë maqedonase, me një fokus të veçantë tek të rinjtë dhe grupet vulnerabël. Përmes projekteve për të zvogëluar hendekun dixhital dhe për të krijuar një shoqëri dixhitale të barabartë, arritëm pothuajse 33,500 përdorues. Këtë vit, lëshuam në përdorim platformën e komunikimit #BëjVend, me të cilën hapëm temën e lidhjes së vërtetë dhe kapërcimit të sfidave me të cilat përballemi si shoqëri. Si pjesë e Grupit Deutsche Telekom, ne jemi të përkushtuar për të reduktuar ndikimin e dëmshëm në natyrë. Prandaj, me aktivitete ekologjike dhe përmes ekonomisë rrethore, ne po ndikojmë gjithnjë e më shumë në reduktimin e mbeturinave elektronike, kurse zgjidhjet tona për qytetet inteligjente po e bëjnë jetën urbane më të qëndrueshme.

Ne do të vazhdojmë të ndjekim strategjinë tonë afatgjatë në vitet në vijim. Ne mbetemi të përkushtuar ndaj rritjes, zhvillimit, inovacionit të vazhdueshëm dhe ofrimit të vlerës maksimale për klientët, punonjësit, partnerët dhe shoqërinë në tërësi. Makedonski Telekom nuk është vetëm një rrjet - ne jemi urë lidhëse drejt së ardhmes digjitale dhe partner në çdo moment tuajin. Me respekt,
Nikolla Ljushev, Sllavko Projkoski, Emilija Andonovska, Maja Milosavleva Naumovska dhe Marjan Bogatinovski.

Arritjet 2024

Neutralitet i CO2

84%Kuryet 55 tonë letër

Fatura elektronike

60% nga burime të rinovueshme

Energji elektrike

80% PËRMES TELECOM CLOUD

Kursim energjie

100%Në pajisjet tona

Paketime të bio-degradueshme

16.000 Celularë të vjetër

Të ricikluar

25.000 përdorues

Përfshirje dixhitale

#1

Kënaqësia e përdoruesve

94pikë

TRI*M Index

63%

Kënaqësia e punonjësve

45%

Përfshirja e grave në menaxhim

Investime dhe teknologji të reja për
zhvillimin e rrjetit më të mirë

Kemi përfunduar një vit tjetër të suksesshëm, të shënuar nga rritje dhe zhvillim, zgjidhje inovative dhe revolucionare, rezultate rekord të cilësisë së rrjetit dhe teknologji të reja që do të ofrojnë një përvojë edhe më të mirë për përdoruesit.

Në vitin 2024, morëm një tjetër konfirmim të cilësisë dhe shpejtësisë së rrjetit - morëm çmimin prestigjioz Ookla® për rrjetin më të mirë në territorin e Maqedonisë. Rezultatet treguan shpejtësinë më të lartë të rrjetit celular dhe fiks dhe cilësinë më të mirë të rrjetit celular në gjysmën e parë të vitit 2024. Statusi superior i rrjetit u vërtetua edhe me një njohje të dytë të madhe, këtë herë të marrë në nivel lokal. Sipas matjeve të cilësisë së rrjeteve celulare nga Agjencia për Komunikime Elektronike (AKE), rrjeti i Makedonski Telekom doli në vendin e parë me 637,7 pikë, që është rezultati më i lartë në Maqedoni për vitin e kaluar.

Me ardhjen e teknologjive të reja, të vjetrat dalin jashtë përdorimit dhe shkojnë në histori. Telekomi është operatori i parë maqedonas, i cili në prill të vitit të kaluar çaktivizoi teknologjinë 3G. Ne e bëmë këtë me qëllim që të ripërdornim spektrin e frekuencave për teknologji më të përparuara si 4G dhe 5G, duke mbajtur kështu një hap me trendet globale të industrisë dhe duke ofruar një rrjet me cilësi më të lartë, më të qëndrueshëm dhe më të shpejtë. Ne vazhdimisht e kemi zgjeruar rrjetin 5G, i cili është në dispozicion të 92% të popullsisë në Maqedoni, me shpejtësi gigabit pothuajse në të gjitha qytetet e vendit. Përmirësimi i rrjetit dhe forcimi i infrastrukturës së rrjetit optik kanë vazhduar gjithashtu, dhe sot kemi pothuajse 3 herë më shumë familje të mbuluara me infrastrukturë optike krahasuar me të gjithë operatorët e tjerë në treg së bashku.

Ne jemi duke punuar vazhdimisht në zhvillimin e zgjidhjeve moderne inovative, duke prezantuar teknologji dhe mjete të reja. Një fokus i madh i është kushtuar përdorimit të inteligjencës artificiale (IA) në operacione, si dhe zgjidhjeve të reja të bazuara në inteligjencën artificiale. Përveç të gjitha risive, softuerëve dhe përmirësimeve teknologjike në rrjet, në vitin 2024 patëm edhe punë të konsiderueshme në terren, duke ngritur infrastrukturën për rrjetin e së ardhmes. Në korrik të vitit të kaluar, ne hodhëm një hap pionier në zhvillimin e infrastrukturës së telekomunikacionit në vend, duke vendosur kabllon e parë optike nënujore nën sipërfaqen e liqenit të Dibrës. Kablloja shtrihet në një gjatësi prej një kilometër dhe siguron stabilitet më të mirë të rrjetit në rajon.

Në përgjithësi, viti 2024 i kaluar ishte një vit shumë i rëndësishëm në aspektin e arritjes së objektivave të modernizimit dhe përmirësimit të rrjetit. Ne vazhduam të investojmë në kapacitetet tona dhe forcuam pozicionin tonë si lider në zbatimin e teknologjive të reja për të ofruar shërbimet më të mira telekomunikuese në Maqedoni.

#1

kënaqësia
e përdoruesve
TRI*M dhe Love Brand

Zgjidhje të avancuara për përvojën më të mirë të përdoruesit

Teknologjia është në zhvillim të vazhdueshëm dhe për këtë arsye ne duhet të përshtatemi shpejt me zgjidhjet moderne për t'u ofruar shërbimin më të mirë përdoruesve tanë. Qasja në rrjet dhe lidhje të shpejtë dhe të qëndrueshme është përparësia jonë kryesore, por ne jemi të përkushtuar të ofrojmë shumë më tepër sesa shërbime telekomunikacioni, të ofrojmë vlerë të vërtetë, një nivel krejt të ri përvojash, një kapitull të ri në të cilin përvojat jetësore dhe kënaqësia e përdoruesve tanë janë në qendër të vëmendjes sonë.

Prandaj, ne jemi duke punuar vazhdimisht për shërbime, produkte dhe mjete dixhitale të reja, si aplikacionet dhe chatbot-et, që e bëjnë më të lehtë përdorimin e shërbimeve tona. Por ne do të shkojmë një hap më tej.

Në vitin 2024, festuam një vit që nga lëshimi në përdorim i Magenta Moments, programit tonë dixhital të shpërblimeve dhe përfitimeve për klientët, i cili ofron një gamë përfitimesh tërheqëse nga marka lokale, kombëtare dhe ndërkombëtare në shumë kategori. Sot kemi më shumë se 280,000 përdorues, dhe vetëm në një vit kemi arritur më shumë se 100 milionë përshtypje dhe kemi shpërblyer mbi 950 milionë zemra. Përkushtimi ynë ndaj shërbimit dhe përvojës më të mirë të përdoruesit ka rezultuar edhe një herë në një vlerësim jashtëzakonisht të lartë në indeksin TRI*M, i cili mat kënaqësinë e përdoruesve dhe sipas të cilit ne jemi numri 1 në Maqedoni. Në vitin 2024, arritëm një vlerë prej 94, ndërsa standardi i industrisë është midis 50 dhe 70, dhe gjithashtu u renditëm të parët sipas Indeksit Love Brand. Kjo na tregon se kemi përdorues besnikë që i besojnë markës sonë, por gjithashtu na motivon të jemi edhe më të mirë.

Vitin e kaluar, ne prezantuam gjithashtu konceptin inovativ Magenta Home, i cili u ofron përdoruesve internet super të qëndrueshëm kudo në shtëpi, menaxhim të thjeshtë të pajisjeve të lidhura, mbrojtje të plotë sigurie dhe kushte për një përvojë të shkëlqyer lojërash. Gjithashtu prezantuam një brez të ri të televizionit dixhital - MagentaTV, një shërbim që është i disponueshëm në çdo kohë, kudo, në të gjitha ekranet, me imazh dhe zë me cilësi të lartë, një ndërfaqe interaktive moderne, qasje në aplikacione, një bibliotekë televizive, regjistrim, ndërprerje të përmbajtjes dhe shumë opsione të tjera të avancuara. Kurse për përdoruesit e aplikacionit celular Telekom MK, ne kemi ofruar gjithashtu një mjet të ri modern të bazuar në inteligjencën artificiale, i projektuar për të ofruar përgjigje të shpejta, të sakta dhe relevante për pyetjet e tyre. Aplikacioni Perplexity AI mundëson kërkim në kohë reale, kërkim mbi tema komplekse dhe krijimin e përmbajtjes së gjeneruar. Përdoruesve të Makedonski Telekom u është dhënë mundësia të aktivizojnë versionin e tij premium, Perplexity Pro, dhe ta përdorin atë falas për 12 muajt e ardhshëm.

Ne mbetemi të përqendruar në ofrimin e vlerës maksimale për përvojën më të mirë të përdoruesit.

Partner për dixhitalizimin e shoqërisë

Ne mbetemi të përkushtuar ndaj rolit tonë në udhëheqjen e transformimit dixhital të shoqërisë përmes inovacionit të vazhdueshëm dhe futjes së zgjidhjeve moderne teknologjike.

Portofoli i zgjidhjeve inteligjente që kemi prezantuar vitet e fundit tani është përmirësuar në Qendrën tonë të zhvillimit të zgjidhjeve të avancuara. Ne jemi të përqendruar në krijimin e një rezultati, jo vetëm të një shërbimi, dhe kjo është arsyeja pse zgjidhjet tona janë gjithëpërfshirëse, kanë vlerë të matshme dhe janë të adaptueshme. Zgjidhja jonë inovative e telemjekësisë, një sistem për monitorimin në distancë të gjendjes së pacientit, është e vetmja zgjidhje e këtij lloji jo vetëm në vend, por edhe në rajon. Në vitin 2024 është implementuar në pesë objekte shëndetësore në pilot komunën e Dellçevës, me rezultate të jashtëzakonshme. Me aplikimin më të gjerë të kësaj zgjidhjeje të adaptueshme dhe me shumë qëllime, do të përmirësohet ndjeshëm kujdesi shëndetësor dhe cilësia e jetës së popullatës së moshuar të vendit.

Transformimi në qytete inteligjente është duke vazhduar, me zgjidhje të reja inteligjente që po zbatohen në disa komuna në Maqedoni. Gjatë vitit 2024, ne zbatuam projekte duke përdorur zgjidhjen tonë të ndriçimit inteligjent, e cila kontrollon dhe rregullon gjendjen dhe intensitetin e dritës sipas nevojave. Në kombinim me matësat inteligjentë, arrihet efikasitet edhe më i madh, si dhe mirëmbajtje më e lehtë e infrastrukturës së ndriçimit publik.

Përmes zgjidhjes inteligjente të matjes dhe menaxhimit të energjisë elektrike me kontrollin IoT dhe rrjetin e lidhjes celulare, ne mundësojmë matjen dhe menaxhimin e automatizuar të konsumit të energjisë elektrike. Me zgjidhjen inteligjente të menaxhimit të ujit, jo vetëm që zvogëlohet humbja e ujit, por mbrohen edhe burimet natyrore, dhe kjo përfaqëson ekologjinë dixhitale në kuptimin e vërtetë të fjalës.

Ne jemi gjithashtu të përkushtuar për të punuar në zgjidhjet e sigurisë kibernetike, të cilat janë me rëndësi të jashtëzakonshme në hapësirën dixhitale. Kjo është arsyeja pse ne ofrojmë zgjidhje të personalizuara për përdoruesit e mëdhenj, por kemi krijuar gjithashtu një shërbim për ndërmarrjet e vogla dhe të mesme që nuk kanë pothuajse asnjë punonjës të teknologjisë informatike (TI). Bëhet fjalë për zgjidhjen Qendra e Operacioneve të Sigurisë, e cila funksionon si një pikë e centralizuar për mbikëqyrje, analizë dhe reagim në kohë reale ndaj incidenteve të sigurisë, dhe gjithashtu përmban një komponent të avancuar për monitorimin dhe zbulimin e kërcënimeve të mundshme kibernetike.

Të gjitha zgjidhjet tona të reja, inovative dhe të përballueshme inteligjente u prezantuan gjithashtu në konferenca biznesi në të gjithë Maqedoninë për vizitorë të shumtë nga sektori i biznesit dhe përdoruesit institucionalë. Qëllimi i këtyre konferencave është aktivitete promovuese, edukimi dhe këshilluese për përdoruesit tanë.

Ne vazhdojmë të jemi një partner i besuar për dixhitalizimin e bizneseve dhe institucioneve, përmes zgjidhjeve tona dixhitale inteligjente, por edhe me angazhimin tonë për të siguruar që teknologjia të funksionojë në dobi të shoqërisë dhe për një jetë më të mirë për të gjithë qytetarët.

Standarde të reja në kulturën e korporatave

Ne konfirmuam edhe një herë se jemi liderë jo vetëm në transformimin dixhital, por edhe në vendosjen e standardeve të larta në kujdesin e punonjësve tanë. Ne kemi bërë një ndryshim në mënyrën se si punojmë dhe kemi filluar të punojmë në mënyrë ndërfunksionale, duke qëndruar pas motos sonë "T si tim/ekip". Në zemër të mënyrës së re të punës është puna në grup/ekip, domethënë, puna zhvillohet brenda ekipeve të fuqizuara dhe të përgjegjshme ku të gjithë marrin përgjegjësi. Qëllimi i proceseve të reja është të krijojnë një mjedis besimi, transparence dhe zhvillimi. Koncepti ynë i ri promovon punën në grup/ekip, marrjen e përgjegjësisë për detyrat individuale, si dhe përgjegjësinë për zhvillimin personal.

Vitin e kaluar, ne u bëmë kompania e parë në Maqedoni që mori certifikatën prestigjioze rajonale të Employer Partner, një çmim i dhënë nga Grupi SELECTIO për përsosmëri në praktikat e burimeve njerëzore. Kjo certifikatë është provë se ne përmbushim standardet më të larta në fushën e menaxhimit të burimeve njerëzore. Është pikërisht kjo qasje që na ka sjellë njohje lokale për punën tonë, pasi Telekomi u shpall punëdhënësi më i parapëlqyer në kategorinë e operatorëve të telekomunikacionit nga "Vrabotuvanje.com".

Kujdesi për mirëqenien e punonjësve tanë është një nga fokuset tona kryesore, prandaj filluam projektin #BëjVend për zakone të shëndetshme dhe së bashku me të gjithë punonjësit u përqendruam në rëndësinë e një jete të përditshme të shëndetshme dhe të ekuilibruar. Me aktivitete të ndryshme dhe këshilla nga ekspertë si nutricionistë dhe psikologë, arritëm të rrisim ndërgjegjësimin për rëndësinë e aktivitetit fizik, shëndetit mendor dhe të ushqyerit të shëndetshëm. Ekipi i Telekomit tregoi përsëri frymën e tij sportive këtë vit dhe mori pjesë në Maratonën e 20-të Wizz Air Shkup. Dhe në frymën e argëtimit sportiv, si pjesë e Grupit Deutsche Telekom, patëm mundësinë të ishim pjesë e euforisë së futbollit të quajtur EURO 2024. Deutsche Telekom është partneri zyrtar kombëtar i EURO 2024, dhe kolegët tanë patën mundësinë të përjetonin nga afër euforinë e këtij spektakli të jashtëzakonshëm futbolli dhe të brohorisnin drejtpërdrejt nga tribunat. Me programin Smart Start ne vazhdojmë të investojmë në talentet e rinj. Kjo iniciativë për punë praktike/stazh ofron mundësi për zhvillim karriere, fitimin e aftësive praktike dhe pjesëmarrjen në projekte domethënëse. Deri më tani, nëpërmjet këtij programi, shumë studentë janë bërë pjesë e ekipit dhe kanë filluar rrugën e tyre profesionale në një nga kompanitë më inovative në vend.

Punonjësit shpërblehen për rezultate dhe përkushtim të jashtëzakonshëm, dhe aktivitetet zhvillimore, si mentorimi, trainimi dhe projektet ndërkombëtare, mundësojnë rritje të vazhdueshme personale dhe profesionale.

Telekomi nuk po ndërton vetëm shoqërinë dixhitale, por gjithashtu po krijon një kulturë të re korporative, në të cilën njerëzit janë fokusi. [ok1] “të fuqizuar” është termi i saktë për empowered, por kur lexohet nuk tingëllon natyrshëm, kështu që autorët mund të marrin në konsideratë opsionin “brenda ekipeve në të cilat anëtarët janë të autorizuar/kanë mundësinë të marrin vendime të pavarura dhe të marrin përgjegjësi personale”. Dikush mund të zgjedhë midis “janë të autorizuar” dhe “kanë mundësinë”. Siç është, nuk është gabim, por kuptimi i plotë nuk përçohet.

„Sot jetojmë në një botë ku jemi më të lidhur teknologjikisht se kurrë më parë. Por a jemi vërtet të lidhur? Po humbasim besimin tek njëri-tjetri, besimin tonë në një të ardhme më të mirë, po izolohemi dhe mbyllemi në vetvete, dhe jemi gjithnjë e më të prirur ndaj konfliktit dhe intolerancës. Markat e mëdha luajnë një rol të madh në shoqëri, dhe pikërisht për këtë arsye ne ndiejmë përgjegjësi për t'u hapur rreth këtyre sfidave me të cilat përballemi si shoqëri dhe për të ndërmarrë hapa konkretë drejt lidhjes së vërtetë“.

Le të bëjmë një vend për t'u lidhur vërtet

#BëjVend

Në botën në të cilën jetojmë sot, njerëzit po krijojnë lidhje të panumërta, bizneset janë të lidhura si kurrë më parë dhe shoqëritë janë të ndërthurura me njëra-tjetrën. Por a jemi vërtet të lidhur? Këtë vit, ne lëshuam në përdorim platformën e komunikimit #BëjVend, me të cilën hapëm temën e lidhjes së vërtetë dhe kapërcimit të sfidave me të cilat përballemi si shoqëri.

Roli ynë me këtë iniciativë ishte të frymëzojmë njerëzit që të bëjnë vend në botën e tyre të brendshme, emocionale, por edhe fizike. Një vend që do të mbushet me më shumë mirëkuptim, empati dhe afërsi, gjë që do të na ndihmojë të lidhemi vërtet. Fushata është frymëzuar nga veprat e autorit të kultit Goran Stefanovski, të cilat janë të gdhendura në kujtesën tonë dhe janë po aq të forta dhe të vërteta edhe sot. Puna e tij është një kujtesë se ka më shumë gjëra që na lidhin sesa na ndajnë.

Iniciativës iu bashkuan një numër njerëzish të famshëm nga vendi, muzikantë të suksesshëm, atletë, aktorë, punonjës të medias dhe aktivistë, të cilët treguan historitë e tyre dhe i bënë thirrje publikut të bënte vend për më shumë të mira në jetën e tyre. Kjo nxiti reflektim mbi një sërë problemesh në shoqëri, hapi tema të ndjeshme dhe ndikoi në pranimin e dallimeve midis njerëzve.

Si pjesë e kësaj iniciative, u promovua edhe kënga "Vendi" nga artistët e rinj Young Dadi, Matej Foltz dhe Zee Bomb, e cila u frymëzua nga ideja kryesore e #BëjVend dhe krijimtaria e Goran Stefanovskit. Kjo këngë tregon historinë e problemeve të vjetra, tensionit, trazirave shoqërore dhe diversitetit përmes zërit të brezit të ri. Por, në vend që thjesht të kritikojë, ajo i bën thirrje të gjithë brezit që të gjejnë më të mirën tek vetja, tek të tjerët, në situatën në të cilën ndodhemi.

Si kulminacion i gjithë iniciativës, realizuam edhe një nga projektet më të mëdha kulturore dhe shoqërore të Makedonski Telekom deri më sot, me mbështetjen e plotë që i dhamë shfaqjes "Imagjino një botë të re" e cila u vu në skenë në Teatrin Kombëtar Maqedonas. Projekti teatror "Imagjino një botë të re" i sjell në jetë fjalët e Stefanovskit rreth vlerave të përjetshme si njerëzimi, mirëkuptimi dhe lidhja, cilësi që shpesh humbasin në jetën e përditshme të sotme. Shfaqja është realizuar në bashkëpunim me Teatrin Kombëtar të Maqedonisë, me regji nga Nella Vitosheviç dhe prodhim nga Sektor Film, me një kast të shkëlqyer aktorësh. Me shfaqjen “Imagjino një Botë të Re”, jo vetëm që përfunduam aktivitetet e nismës #BëjVend, por edhe një herë demonstruam mbështetjen tonë për kulturën vendase, për vlerat e qëndrueshme dhe për artistët që kanë lënë një gjurmë të pashlyer në trashëgiminë tonë kulturore.

Të përkushtuar për një të ardhme më të mirë

Në botën e sotme të lidhur, përgjegjësia është jashtëzakonisht e rëndësishme. Një përgjegjësi që shkon një hap më tej sesa krijimi i një infrastrukture superiore. Përgjegjësi për qëndrueshmërinë dhe ruajtjen e burimeve natyrore, përgjegjësi për shoqërinë, për zvogëlimin e hendekut dixhital dhe një shoqëri dixhitale të barabartë. Përgjegjësi për një të ardhme të përbashkët dhe të qëndrueshme.

Një shoqëri më e mirë për të gjithë

Ne e marrim seriozisht rolin tonë si një markë e rëndësishme në komunitet dhe veprojmë për të ndërtuar një shoqëri më të mirë për të gjithë. Angazhimi ynë strategjik është të mbështesim sportin, kulturën dhe filantropinë, me fokus tek të rinjtë dhe grupet vulnerabël.

Sporti maqedonas është një nga segmentet ku ne ofrojmë vazhdimisht mbështetje aktive, e cila tradicionalisht vazhdoi edhe gjatë vitit të kaluar. Në vitin 2024, vazhduam partneritetin tonë me Kombëtaren e Hendbollit të Maqedonisë, e cila vazhdon për të tetin vit me radhë, dhe mbështetëm anëtarët e ekipit kombëtar që morën pjesë në Kampionatin Botëror në Katar.

Ne gjithashtu mbështesim e-sportet përmes Kampionatit T-esport, i cili angazhon entuziastë të rinj dhe lojtarë gjysmë-profesionalë të e-sporteve nga Evropa Qendrore dhe Lindore. Kjo është një mundësi për lojtarët e rinj që të shfaqin aftësitë e tyre në një skenë të madhe dhe të fitojnë përvojë të paçmuar në botën e e-sporteve. Makedonski Telekom është mik i Festivalit Veror të Ohrit për tre dekada, një ngjarje që është një nga promovuesit më të mëdhenj të kulturës sonë kombëtare.    Dhe si një ngrohje për sezonin e verës, i ftuam të rinjtë të jenë pjesë e "Vera për t'u kujtuar", e shoqëruar nga 10,000 përvoja muzikore falas në të gjithë Evropën dhe një ngjarje unike e organizuar nga Telekom Electronic Beats me DJ HEARTSTRING dhe Sugababes. "Vera për t'u kujtuar" është një ngjarje e krijuar për të rinjtë nga vendet evropiane ku Deutsche Telekom është e pranishme, për t'u ofruar atyre akses në një sërë përvojash muzikore. Qëllimi është që të rinjtë nga e gjithë Evropa të lidhen me njëri-tjetrin dhe të krijojnë kujtime që do të zgjasin gjatë.

Ne përdorim teknologjinë për të siguruar një cilësi më të mirë jetese përmes projekteve të tilla si "Butoni i Emergjencës", në partneritet me Kryqin e Kuq. "Butoni i Emergjencës" synon të ofrojë një reagim të shpejtë për individët e moshuar ose të dobët përmes shtypjes së thjeshtë të një butoni të vendosur në një pajisje në formë ore dore.

Në vitin 2024, Fondacioni Telekom për Maqedoninë filloi bashkëpunimin me shoqatën Konekt për platformën e donacioneve në grup www.opop.mk, e cila synon të ndihmojë shumë organizata të shoqërisë civile në vend, të cilat luftojnë për një jetë më të mirë për grupet e cenueshme të qytetarëve, një mjedis të shëndetshëm dhe zgjidhjen e problemeve lokale, për të mbledhur fonde, por edhe për t'u lidhur me partnerë dhe donatorë të mundshëm në të ardhmen. Të gjitha projektet në platformë kanë një ndikim të gjerë dhe/ose afatgjatë në zgjidhjen e problemeve të qytetarëve dhe përmirësimin e jetës së komuniteteve lokale. Ky është një mekanizëm strategjik filantropik që u lejon donatorëve të forcojnë ndikimin e tyre në një nivel më të lartë duke bashkuar donacionet.

Ne mbetemi të përkushtuar për të mbështetur vlerat e vërteta, të motivuar për t'i dhënë mbështetje komunitetit në të cilin veprojmë.

Kulturа

Sport

Ne investojmë në një të ardhme të qëndrueshme

Si pjesë e Grupit Deutsche Telekom, ne jemi të përkushtuar për të reduktuar ndikimin tonë të dëmshëm në natyrë. Ndryshimi i klimës na prek të gjithëve dhe ne kemi një përgjegjësi të përbashkët për të bërë një ndryshim. Ne kemi arritur neutralitet të plotë të CO2 në operacionet tona, dhe përmes ekonomisë rrethore po kontribuojmë gjithnjë e më shumë në zvogëlimin e mbeturinave elektronike. Përmes fushatës sonë lokale për reduktimin e mbeturinave elektronike, e cila mban etiketën Green Magenta, deri më tani janë mbledhur 40,000 pajisje të vjetra celulare.

Deri në 60% të të gjithë energjisë elektrike që përdorim sot vjen nga burime të rinovueshme, dhe ne mbetemi të përkushtuar për t'u bërë një kompani më e qëndrueshme në çdo aspekt të aktiviteteve tona.

Duke zëvendësuar një shifër të jashtëzakonshme prej 84.14% të faturave në letër me ato elektronike, kemi arritur të kursejmë deri në 55 ton letër gjatë 365 ditëve të fundit. Jemi krenarë që kemi prezantuar paketimin e biodegradueshëm për të gjitha pajisjet që shesim në vitin 2024. Ky është një hap i madh drejt heqjes dorë nga mbeturinat e paketimit të pariciklueshme dhe është një masë tjetër në përputhje me moton e ditës së Planetit Tokë të vitit të kaluar, e cila është "Planeti kundër plastikës". Përveç kësaj, ne ricikluam deri në 9,600 telefona celularë gjatë vitit 2024 përmes iniciativave tona ekologjike, siç është Eko Zbritje. Funksionaliteti i Telekom Cloud tonë na mundësoi të arrijmë kursime të konsiderueshme të energjisë elektrike deri në 80%. Nga ana tjetër, zgjidhjet e qyteteve inteligjente përmirësojnë cilësinë e jetës dhe mundësojnë që jeta urbane të bëhet më e qëndrueshme duke ulur konsumin e energjisë dhe ndotjen nga drita dhe zhurma, si dhe duke ulur emetimet e CO2. Kjo është urgjentisht e nevojshme, pasi qytetet janë përgjegjëse për më shumë se 70 përqind të emetimeve globale të CO2.

Krahas kujdesit që të jemi të orientuar nga mjedisi në punën tonë, ne inkurajojmë iniciativat me të cilat apelojmë dhe ftojmë të gjithë komunitetin t'i bashkohet eko-misionit për një botë më të pastër, më të shëndetshme dhe më të bukur dhe me mjetet dhe zgjidhjet dixhitale që zhvillojmë, krijojmë mundësi që ky vizion të bëhet realitet.

Inovacionet që po zhvillohen në sistemin tonë në të ardhmen do të na lejojnë jo vetëm të kursejmë, por edhe të jemi më efikasë, më të sigurt dhe të kemi kontroll më të madh mbi punën tonë. Angazhimi ynë strategjik është afatgjatë dhe i përcaktuar qartë - të jemi një operator dixhital kryesor që përfaqëson një të ardhme të përbashkët dhe të qëndrueshme.

Restaurimi i burimeve natyrore dhe mbrojtja e tyre do të jetë fokusi ynë, si dhe detyrimi ynë, në vitet që vijnë. Qëllimi ynë është të punojmë së bashku për të krijuar një mjedis më të shëndetshëm dhe një të ardhme më të mirë për të gjithë.

Viti 2024, një vit me rezultate të jashtëzakonshme

Makedonski Telekom e mbylli vitin 2024 me rezultate të suksesshme, duke arritur rritje të vazhdueshme gjatë gjithë vitit. Operacionet e suksesshme bazohen në strategjinë e teknologjive të reja pioniere dhe përvojën më të mirë të përdoruesit. Të ardhurat nga shitjet u rritën me 2 përqind, kurse fitimi operativ para interesave, taksave dhe amortizimit (EBIDTA) me 0.3 përqind krahasuar me të njëjtën periudhë të vitit të kaluar. Fitimi neto u rrit me deri në 7.6 përqind, kurse investimet totale kapitale (CAPEX) në fund të vitit 2024 arritën në 2,286 milionë denarë.

denarë. Ne vazhduam të investojmë në infrastrukturën e rrjetit dhe teknologjitë më të fundit, të cilat përforcuan statusin tonë si rrjeti më i mirë. Ne mbetëm liderë në mbulimin me fibra dhe në fund të vitit 2024 kishim 344 mijë aksese me fibra, që është 9.6 përqind më shumë krahasuar me të njëjtën periudhë të vitit të kaluar. Rrjeti ynë 5G është i disponueshëm për 93 përqind të popullsisë në Maqedoni me shpejtësi gigabit në pothuajse të gjitha qytetet. Ne kemi fituar edhe një herë çmimin prestigjioz Ookla® për Rrjetin më të Mirë. Rezultatet treguan shpejtësinë më të lartë të rrjetit celular dhe fiks, si dhe cilësinë më të mirë të rrjetit celular. Përvoja superiore e përdoruesit vazhdoi trendin e rritjes së numrit të përdoruesve në të gjitha segmentet. Numri i përdoruesve të internetit me brez të gjerë u rrit me 3.5 përqind dhe arriti në 218 mijë, ndërsa numri i përgjithshëm i akseseve në internet u rrit me 3.7 përqind. Në telefoninë fikse, Makedonski Telekom, me një pjesëmarrje në treg prej 62,2 përqind dhe 233 mijë klientë, është lider në treg. Në segmentin celular, pjesëmarrja në treg është 48,1 përqind me një bazë të qëndrueshme prej 1,28 milion klientësh. Programi i parë dixhital i shpërblimeve dhe përfitimeve për klientët, Magenta Moments, arriti në 280 mijë përdorues, ndërsa pozicioni numër një në treg u konfirmua nga indeksi TRI*M për matjen e kënaqësisë së përdoruesve, si dhe nga indeksi Love Brand.

Edhe këtë vit, ne punuam në mënyrë aktive për një shoqëri dixhitale të barabartë dhe për reduktimin e efekteve të dëmshme në mjedis. Përmes projekteve për të zvogëluar hendekun dixhital dhe një shoqëri dixhitale të barabartë, kemi arritur pothuajse 33,500 mijë përdorues. Edhe këtë vit, ne vazhduam aktivitetet ekologjike për të mbledhur dhe ricikluar pajisjet e vjetra dhe për të kontribuar në reduktimin e emetimeve të dëmshme të CO2, duke qenë një kompani neutrale ndaj CO2. Ekipi ynë është shtytësi i progresit tonë dhe këtë vit ne u shpallëm punëdhënësi më i preferuar/parapëlqyer ndër kompanitë e telekomunikacionit në shkallë vendi. Me atë rast, na u dha certifikata prestigjioze Employer Partner.

Kjo është strategjia jonë afatgjatë dhe është pjesë e axhendës sonë ESG, të cilën do të vazhdojmë ta ndjekim edhe në vitet e ardhshme.

Raporti financiar për vitin 2024 (.pdf)