Shkup, 22 korrik 2022 – Në eventin final të sfidës rinore Gjeneratë pa kufij – Teknologji për planetin, u zgjodhën dy ekipe, inovatorë të rinj, të cilët do të na përfaqësojnë në sfidën globale Gjeneratë pa kufij 2022.

Pesë ekipe të përbëra nga të rinj të moshës 16 deri në 24 vjeç i prezentuan idetë e tyre për përballjen me ndryshimet klimatike nëpërmjet përdorimit të teknologjive digjitale.

Sipas prezantimeve dhe vlerësimeve të jurisë së ekspertëve, ekipet Bio Techno Logic dhe Green Hot Chili Peppers u zgjodhën si fitues.

Sfida rinore realizohet përmes partneritetit të UNICEF-it dhe Fondacionit Telekomi për Maqedoninë. Këtë vit sfida u zbatua nga Qendra e Inovacionit Social BLINK 42 – 21.

Idetë e të rinjve do të kontribuojnë në mbrojtjen e mjedisit, si në nivel kombëtar ashtu edhe në atë global. Ekipi i Bio Techno Logic ka krijuar një kosh të automatizuar dhe digjital për mbetjet organike, që në fazën përfundimtare do të prodhojë biohumus natyral. Nga ana tjetër, ekipi i Green Hot Chili Peppers ka një ide për të mbrojtur mjedisin duke bërë një shportë të veçantë, e cila në mënyrë të pavarur përzgjedh mbetjet dhe prodhon energji elektrike në të njëjtën kohë.

Si rezultat i ideve novatore, juria e ekspertëve vendosi të shpërblejë një ekip tjetër, me një çmim në të holla prej 2.500 euro (për avancimin e idesë) dhe mbështetje mentore. Duke e marrë parasysh se industria e modës është përgjegjëse për 10 për qind të emetimeve globale të CO2, Ekipi Oh Swapp planifikon të zhvillojë një aplikacion celular për shkëmbimin e rrobave dhe librave.

Në eventin e sotëm final të sfidës, përfaqësuesja e UNICEF-it Patricia DiXhovani iu drejtua të rinjve. Ajo theksoi: "Jemi të lumtur që ju krijojmë mundësi për të zhvilluar ide për t'u marrë me ndoshta kërcënimin më të madh për të ardhmen tonë - ndryshimet klimaterike. Vazhdoni të besoni në veten tuaj dhe idetë tuaja, vazhdoni të kërkoni përgjigje dhe zgjidhje për problemet që dëshironi t’i largoni. Të gjitha inovacionet e mëdha fillojnë si një ide dhe një gatishmëri për të vepruar, dhe unë jam krenar që e shoh këtë tek ju sot”.

Lea Lipsha nga Fondacioni Telekomi për Maqedoni e theksoi mbështetjen që vazhdimisht e ofrojnë për inovacionet sociale dhe idetë rinore. Ajo u bëri thirrje të rinjve që të besojnë në vetvete dhe të përfitojnë nga mundësia e dhënë. “Ne kemi treguar vazhdimisht se kemi të rinj që mund të konkurrojnë me moshatarët e tyre në botë dhe të jenë më të mirë se ata. Teknologjia është mjeti më i mirë për t'u përballur me sfidat e sotme, për ta përdorur atë dhe për t'i treguar botës se çfarë potenciali kemi”, tha Lipsha.

Sfida këtë vit u zbatua nga Qendra për Inovacione sociale BLINK 42 - 21. Kjo organizatë realizoi një fushatë në terren dhe digjitale, e cila i informoi të rinjtë për mënyrën se si të aplikojnë për këtë sfidë. Në thirrjen publike kanë mbërritur 40 aplikime, nga gjithsej 127 gjimnazistë dhe nxënës.

Zorica Vellkovska, bashkëthemeluese e BLINK 42 – 21, theksoi se organizata i ka dhjetë vjet që punon me të rinjtë dhe vazhdimisht po krijohen mjete digjitale që lehtësojnë jetën e përditshme të të gjithë qytetarëve.

“Zbatimi me sukses i sfidës është një konfirmim se të rinjtë meritojnë edhe më shumë mbështetje në shoqërinë tonë. Mbështetja duhet të jetë shumë specifike dhe praktike. Përmes kësaj sfide, të rinjtë i zbatojnë njohuritë e tyre në praktikë, kontribuojnë për një mjedis më të shëndetshëm jetësor, por edhe inkurajojnë ndërveprimin dhe komunikimin mes nxënësve të shkollave të mesme dhe nxënësve nga qytete të ndryshme”, tha Velkovska nga BLINK 42-21.

Informacione të shkurtra për ekipet fituese:

Bio Techno Logic – Angella Isovska, Mihaela Petrovska dhe Jovan Dejanoski janë krijuesit e rinj që kanë punuar në "soil bin" muajt e fundit - një shportë e automatizuar dhe digjitale për mbeturinat organike, në të cilën mbeturinat më pas dekompozohen me ndihmën e krimbave kalifornian, me çka fitohet biohumus natyral. Me automatizimin e procesit të mirëmbajtjes, për funksionimin e biodegradimit, koshi do të jetë i thjeshtë për t'u mirëmbajtur, kështu që do të pranohet dhe aplikohet në amvisëri dhe industri, dhe me një aplikacion celular do të mundësohet menaxhimi i pajisjes edhe kur ne nuk jemi afër tij.

Green Hot Chili Peppers - Nikolla Kocevski, Ljubica Ristovska, Kristina Cokovska, Jovan Simonovski dhe Teodora Petrovska janë studentë-inovatorë të rinj, ambientalistë dhe entuziastë, të cilët janë pjesë e ekipit Green Hot Chili Peppers. Thelbi i idesë së tyre është një zgjidhje e përhershme për problemin e mbetjeve, me theks në pjesën e përzgjedhjes. Ata po zhvillojnë një zgjidhje për një kosh "të zgjuar", i cili do të përdorë sensorë për të përzgjedhur mbetjet në disa kategori dhe mbi të do të vendosen panele diellore, duke e bërë produktin efikas në energji. Përveç kësaj, ata do të krijojnë një aplikacion celular që do t'i motivojë qytetarët të selektojnë, në mënyrë që të marrin pikë dhe përfitime të caktuara.

Pres Qendra

{{Title}}