UNICEF-i dhe Fondacioni “Telekomi për Maqedoninë” së bashku me adoleshentët krijojnë fushatë onlajn për hapësirë digjitale më të sigurt

Shkup, 22 maj 2023: UNICEF-i së bashku me Fondacionin “Telekomi për Maqedoninë” organizon një sërë punëtorish me fëmijë dhe të rinj për krijimin e përbashkët të nismave për komunikim kundër bullizmit kibernetik dhe gjuhës së urrejtjes në hapësirën digjitale.

Gjatë punëtorive, të cilat filluan këtë fundjavë, 30 fëmijë dhe të rinj në sesionet për ideim dhe dizajn e ndihmuan grupin e punës për hartimin e fushatës dhe zhvillimin e mesazheve

“Adoleshenca është periudha më e mirë për stimulimin e të menduarit krijues dhe inovacioneve. Kjo është gjithashtu mosha më e mirë për të mësuar se si të zgjidhni problemet dhe të kujdeseni për të tjerët”, tha Patricia DiXhovanni, përfaqësuese e UNICEF-it, në hapjen e punëtorisë. “Kjo është arsyeja pse jam shumë e emocionuar kur i shoh të rinjtë që përfshihen dhe luftojnë me një nga sfidat më të mëdha që ata e kanë identifikuar vetë – bullizmin kibernetik dhe gjuhën e urrejtjes”.

Si gjeneratë që harxhon shumë kohë në internet, të rinjtë janë nën kanosjen më të madhe nga gjuha e urrejtjes onlajn dhe bullizmi kibernetik. Bëhet fjalë për fenomene të çuditshme të shoqërisë bashkëkohore të cilat shkaktojnë shqetësime dhe probleme gjithnjë e më të mëdha te të rinjtë, por edhe te prindërit, tutorët dhe edukatorët e tyre.

Një sondazh nacional i U-Report i bërë së fundmi tregoi se vitin e kaluar, 24 për qind e të anketuarve të rinj kanë ndjerë ndonjë kërcënim në internet, çdo i treti i anketuar ka qenë viktimë e bullizmit kibernetik, gjegjësisht, më së shpeshti janë fyer ose nënçmuar dhe bullizmi kibernetik, kryesisht ndodh në rrjetet sociale (71%) dhe në çate (12%).

“Të rinjtë sot kanë detyrë me të vërtetë të rëndë, kundër urrejtjes përveç se duhet të luftojnë në botën reale ata duhet të luftojnë edhe në botën onlajn. Ndërsa detyrë e jona është t’i nxisim, inkurajojmë, t’u japim zë të ndërtojnë internet pa urrejtje”, tha Lea Lipsha, drejtoreshë e Fondacionit Telekomi për Maqedoninë, në hapjen e punëtorive.

Gjatë punëtorisë, të rinjtë mësuan më shumë rreth bullizmit kibernetik, si ta njohin dhe parandalojnë atë, i përcaktuan qëllimet e fushatës për ndryshimin e sjelljes dhe punuan mbi një narrativ të fuqishëm. Të udhëhequr përmes një procesi të ideimit të dizajnit, ata i përcaktuan target-grupet dhe përgatitën një plan për fushatë dhe koncepte të produkteve.

Në frymën e krijimit të përbashkët, i gjithë procesi udhëhiqet nga fëmijë dhe të rinj nën drejtimin e psikologëve, ekspertëve krijues dhe ekspertëve të komunikimit. Qëllimi është të sigurohet një hapësirë ku të rinjtë do të krijojnë një fushatë digjitale për ta bërë internetin një hapësirë më të sigurt për fëmijët dhe të rinjtë.

Punëtoritë do të vazhdojnë fundjavën e ardhshme, kur pjesëmarrësit do të fokusohen në krijimin e videove dhe materialeve të tjera komunikuese. Fushata do të fillojë në qershor.

Nisma e titulluar “Së bashku për një internet pa urrejtje” është pjesë e një partneriteti afatgjatë ndërmjet UNICEF-it dhe Fondacionit “Telekomi për Maqedoninë”, i cili synon t’i përfshijë fëmijët dhe të rinjtë në luftën kundër disa sfidave të mëdha me të cilat përballet gjenerata e tyre.

Pres Qendra

{{Title}}