Makedonski Telekom e zbatoi projektin që do të sjellë 80% kursime dhe mbrojtje të mjedisit jetësor

Edhe një komunë tjetër në Maqedoni e ka filluar transformimin në një qytet të zgjuar me instalimin e ndriçimit të zgjuar rrugor. Në Kriva Pallankë, është instaluar një sistem me mbi 2000 llamba, të cilat ndizen dhe fiken sipas nevojës, ndërsa prapa gjithë procesit qëndron një platformë për një qytet të zgjuar, në të cilit mund të shtohen aplikacione dhe përmbajtje të reja. Qëllimi është sigurimi i ndriçimit më të mirë në rrugë dhe në vendet publike për 60%, zvogëlimi i faturave të energjisë elektrike të komunës deri në 80% dhe zvogëlimi i ndjeshëm i emetimeve të dëmshme të dioksid karbonit në ajër.

Me këtë aktivitet Kriva Pallanka e fillon transformimin në një komunë moderne dhe të qëndrueshme, në të cilën cilësia e jetesës së qytetarit vihet në vend të parë.

“Deri më tani kemi paguar rreth 800.000 denarë në muaj për ndriçimin publik, ndërsa me instalimin e ri efikas energjetik, shpenzimet tashmë janë zvogëluar në vetëm rreth 100.000 denarë në bazë mujore. Përveç që do të kemi ndriçim me cilësi më të mirë, pritet që defektet e rrjetit të ndriçimit publik të reduktohen në minimum, sepse jeta e shërbimit të ndriçimit të ri është 100.000 orë pune ose rreth 20 vjet. Ndriçimi i përmirësuar mundëson rritjen e funksionalitetit të rrugëve, veçanërisht gjatë natës, gjë që do të kontribuojë edhe për sigurinë më të madhe të qytetarëve", tha kryetari i Komunës së Kriva Pallankës, Borjanço Micevski.

Ndriçimi i zgjuar u zbatua nga Makedonski Telekom, sistemi dhe teknologjia e të cilit janë unike jo vetëm në vend, por edhe në rajon, me çka kjo komunë në pjesën lindore të vendit shkruan një faqe të re në historinë moderne të qyteteve të zgjuara.

"Përfitimet e këtij vendimi janë të mëdha, ndërsa potenciali është akoma më i madh, sepse në platformën Qytet i zgjuar mund të shtohen pafundësisht aplikacione dhe elementë të rinj me interes për qytetarët dhe komunitetin lokal. Vendimet për qytet të zgjuar janë një shembull i përdorimit të teknologjisë për t'i shërbyer qytetarëve. Kjo duhet t’i motivojë komunat e tjera që të bashkohen me transformimin digjital, i cili do të sjellë një jetë më të mirë, ekonomi dhe më e rëndësishmja një mjedis të shëndetshëm”, deklaroi Goce Mitevski, drejtor kryesor komercial për konsumatorët afarist në Makedonski Telekom.

Përveç Kriva Pallankës, komunat Makedonska Kamenicë, Çeshinovë-Obleshevë dhe Vasilevë në bashkëpunim me Makedonski Telekom tashmë po zbatojnë ndriçim të zgjuar të rrugëve, ndërsa po përfundon edhe projekti Shkupi, qytet i zgjuar, me të cilin do të transformohet plotësisht kryeqyteti.

Lajme

{{Title}}