ИТНО КОПЧЕ

Како технолошки лидер и предводник на дигитализацијата, во Македонски Телеком АД имаме одговорност да овозможиме технологијата и иновациите да бидат присутни насекаде, но и да ги користиме како алатка за намалување на дигиталниот јаз и за подобар живот за сите.

„Итно копче” е проект на Црвениот крст којшто е поддржан од Фондацијата „Телеком за Македонија” и претставува револуционерно решение чијашто цел е со помош на технологија да обезбеди брза реакција за повозрасните или изнемоштените лица преку едноставно притискање копче коешто се наоѓа на уред во форма на рачен часовник. Оваа иновативна услуга работи деноноќно, нуди итна помош и претставува вистински пример за тоа како технологијата може да се искористи за да се спаси нечиј живот.

Во многу европски земји овој концепт веќе се покажа како многу успешен, а во Македонија се реализира за прв пат од минатата година како пилот проект со голем потенцијал.

Како функционира уредот? Корисниците на уредот треба само да притиснат едно копче и да чекаат одговор од операторот на контакт центарот на Црвениот крст. По воспоставувањето контакт, корисниците можат да споделат детали за своите проблеми, а обучениот оператор дава насоки за постапување. Доколку е потребно, на нивната локација се испраќа тим за прва помош, дури и се организира превоз до соодветната здравствена установа.

Оваа иницијатива ја нагласува моќта на технологијата за подобрување, па дури и спасување животи, обезбедувајќи им мир на оние коишто можат да се најдат во итни ситуации.

„Тимот на „Итно копче” се состои од посветени професионалци чијшто приоритет е да бидат силна поддршка на повозрасната популација и на сите на кои им е потребен ваков вид на грижа” - истакна д-р Саит Саити, Генералниот секретар на Црвениот Крст.

Оваа услуга моментално поддржува 110 корисници, првенствено лица над 65 години коишто живеат сами во Скопје, корисници на услугата „Помош и нега во домот”, други ранливи лица коишто живеат самостојно, корисници на „Грижа за стари лица во домашни услови” и „Дневен центар за стари лица”.

„Итно копче” им нуди на корисниците прва помош и психолошка поддршка од страна на обучен персонал којшто е посветен на нивната благосостојба, бесплатно одржување на уредот во случај на технички проблеми, како и превоз до соодветната здравствена установа со специјализирани возила.

Технологијата е алатка којашто треба да служи за подобрување на квалитетот на живот, а Телеком е посветен да ја исполни оваа мисија.

Итно копче

{{Title}}