Студентите на ФЕИТ меѓу првите ќе ја тестираат новата технологија што ќе се воведе во Европа по 2020 година

Денес, во Скопје, по повод 17 мај – Светскиот ден на телекомуникациите, Македонски Телеком и ФЕИТ објавија партнерство за тестирање на 5G технологија.

Македонски Телеком ќе инсталира 5G опрема и уреди за тестирање со што ќе им овозможи на студентите и професорите први да работат на функционалностите на овој нов технолошки стандард. Добиените резултати ќе се користат за научни цели и унапредувања на услугите кои во иднина ќе им бидат достапни на корисниците.

Тестирањата ќе се прават на новата опрема од Македонски Телеком и во новата „5G Evolution Laboratory“ во рамки на Лабораторијата за безжични и мобилни мрежи, која припаѓа на Институтот за телекомуникации на ФЕИТ.

„Нашите професори и студенти повеќепати се наградувани со престижни признанија за проекти што се развивале во постојната лабораторија. Отсега, со новата 5Ge опрема и уреди, во новоформираната лабораторија ќе ја имаме првата и единствена можност во земјава за тестирање, експериментирање и проучување на реални сценарија поврзани со идните технологии. Реалното тестирање на оваа технологија ќе им даде голема предност на нашите професори, соработници и студенти и сигурна сум дека ќе продуцира нови решенија и иновации“, изјави Лилјана Гавриловска, редовен професор на ФЕИТ.

5G или мрежата на петтата генерација во наредните години не само што ќе донесе огромни брзини на пренос на податоци преку интернет и комуникација во реално време, туку целосно ќе го смени начинот на којшто функционира нашето општество.

„Ние интензивно работиме да овозможиме тестна околина за најновата мобилна технологија од петтата генерација - 5G, како една од последните фази пред подготовка на деловна студија за комерцијална имплементација. Планираме инвестиции во мрежата кои ќе отворат нови можности за врвно корисничко искуство.

Минатата година го изведовме првото 5G демо во регионот, а до крајот на годинава ќе имаме тестна платформа со која ќе добиеме искуства во реално опкружување.

Преку парнерството со ФЕИТ и соработка со академската заедница, ќе се овозможи приближување на 5G технологиите до студентите, идните телекомуникациски професионалци кои ќе имаат можност први да ги тестираат придобивките од новата револуционерна технологија“изјави Никола Љушев, Главен извршен директор на Македонски Телеком.

Повеќе за „5G Evolution Laboratory” на ФЕИТ

„5G Evolution Laboratory” е новоформирана лабораторија во рамките на Лабораторијата за безжични и мобилни мрежи при Институтот за телекомуникации. Лабораторијата е опремена преку НАТО проект за емулација на 5G јадрена мрежа и виртуелен радио пристап, користејќи софтверски дефинирано радио. Преку соработката со Македонски Телеком, „5G Eolution Laboratory” дополнително ќе се надгради со реални 5G уреди за тестирање на перформансите и ќе прерасне во најсовремена лабораторија во земјата каде што ќе се тестираат 5G мобилни технологии и системи.

Лабораторијата за безжични и мобилни мрежи досега се користеше за проекти од областа на безжичните и мобилните комуникации со примена кај 3G и 4G мрежите. Станува збор за истражувачка лабораторија во која се извршуваат истражувања и тестирања поврзани со тековните проекти и иновативни технолошки решенија (виртуелизација, мапи за радио покриеност, динамичен пристап кон спектар, интелигентни инфраструктури, само/организирачки мрежи и друго). Лабораторијата е акредитирана и за Мерења на карактеристики и сообразност на радио опрема и Мерења на радио спектар. Во оваа лабораторија досега се реализирани повеќе проекти од областа на безжичните и мобилните комуникации, како и студентски истражувања во рамките на дипломски, магистерски и докторски трудови. Членовите на лабораторијата повеќепати се наградувани со престижни меѓународни признанија. Опремата, подигањето на хардверската платформа и новиот софтвер ќе овозможат тестирања на најновите мобилни технологии и системи со што академскиот кадар заедно со студентите ќе имаат можност да работат во првата лабораторија за тестирање на 5G во земјава.

Соопштенија за медиуми

{{Title}}