Партнерство на Фондацијата Телеком за Македонија и УНИЦЕФ

Нашето општество се менува со голема брзина. Влегуваме во нова ера, а дигитализацијата е носител на таа трансформација. Во ова време кога рапидно растат технолошките иновации треба да се запрашаме дали создаваме општество еднакво за сите или оставаме голем дигитален јаз за ранливите групи. Време е да преземеме мерки и да создадеме фер дигитално општество, каде технологијата ќе им служи подеднакво на сите. Водени од оваа идеја Фондацијата Телеком за Македонија и УНИЦЕФ неодамна објавија партнерство со кое ќе се работи на проширување на можностите за вклучување на децата и младите со попреченост во дигиталното општество. Партнерите, заедно со млади луѓе, ќе создаваат иновативни дигитални решенија за подобар пристап до образование и инклузија на лицата со попреченост во заедницата. Партнерството се состои од две големи иницијативи:

„Generation Unlimited” – јавен повик до млади иноватори од земјата за осмислување дигитални решенија за намалување на бариерите со кои децата и лицата со попреченост се соочуваат во образованието и секојдневниот живот. Ќе се оформат десет тимови кои ќе работат на развивање на идеите за дигитални решенија, а во секој тим ќе има по едно лице со попреченост. Тимовите ќе работат под менторство на инженери, маркетинг и ИТ специјалисти од Македонски Телеком, а најдобрите три идеи ќе бидат финансирани и реализирани.
„Без граници“ – дигитална мапа за пристапност за лица со попреченост. Преку партнерството ќе се изработи и дигитална мапа за пристапност со која луѓето ќе можат да се информираат и да ги посочат бариерите, но и позитивните примери на пристапност во: згради, пешачки патеки и премини, јавен превоз, паркинг, игралишта, тоалети итн. Преку партнерството мапата ќе се изработи како дигитална платформа. Целта е преку оваа дигитална алатка да се обезбеди полесно движење и пристапност што е една од основите за еднаков третман на овие лица. Со текот на времето платформата дополнително ќе се развива во соработка со надлежните институции, локалните организации и здруженија на родители.

Ова е второ партнерство на УНИЦЕФ и Фондацијата Телеком за Македонија. Во 2015 година под слоганот „Првите 5 најважни на свет“ беа отворени 8 центри за ран детски развој со кои децата во руралните средини добија еднакви можности за рана едукација, која им помага да бидат подобри во училиште и воопшто во животот.

Вест

{{Title}}